صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 4195

رئيس التحرير خالد هلال المطيري

درايش : غياب العاشق

  • 09-08-2019

إلى روح الراحل العزيز/ محمد الغربللي (بوفيصل)

جسمك يغيب وينطوي الغيم ويروح

ويبقى الذي ما غاب منّك ولا راح...

طيبك وذِكْرك واصطبارك على جروح

و"مبدأ" شهامه ما تغيَّر ولا انْزاح

وحُبّك وعشقك منكتب نقْش في لوح

للّي لها اشْتطيت في بذل الأرواح

ولمّا بلحظات التجلّي لنا تبوح:

انْحبها... لو الثمن طعن وأرماح

كم كان في قلبك أمل... ورد ويفوح

ونشوف في عيونك فرح كل ما لاح

علّمْتنا إن الخطا دوم مسموح

إلّا "المبادئ" دونها الشخص ذبّاح

وعلّمْتنا إن البلد طين وصروح

بس الأهَم "إنسانها" حُر مرتاح

وانت الثقيل وبسمتك تحرس الدوح

وانت الغضوب إن شِفت طير الشجر ناح

ياللي عشقت الأرض من داخل الروح

يوم ادفنوك ترابها بالعطر فاح

فاجأتنا... وبالطاوله كتاب مفتوح

صفحات طيَّرها الهوا بريش وجناح

وكتاب مطوي بالمعاني ومجروح

إللي على وجهه انخدم والحبر ساح

هذا وندري الباب مقفول باللوح

وما عندنا لذيك المغاليق مفتاح

وأقدارنا تعد الخَرَز دون ما تبوح

وأيامنا حبّات في سِلْك مسباح